| غادة عبود تكتب فى عيد الحب: أنا خلاص زهقت من البوس.. نصائح للبنات المصريات فى عيد الحب.. الورد أكبر مؤشر خطر .. احذرى تتكلمى من قلبك.. اعرفى إنو الرادار بتاعه هيلقط ضعفك |
| اليوم السابع : 13 - 02 - 2010 |
فاكرين المشهد من فيلم ½ ساعة جواز لما الزعيم عادل إمام كان دوره ممثل ناشئ فيروح التصوير يتضرب ويتضرب.. يحاول يقول للمخرج كفاية ضرب أنا عايز أبوس زى يوسف شعبان، يروح المخرج مزعقله: أ. يوسف شعبان يبوس، انت تتضرب بس.. فى نفس الوقت، كان مفهم ماجدة الخطيب إنو نجم كبير، فتسأله: هه عملت إيه فى التصوير؟ يرد: بوس.. بوس..بوس... أنا خلاص زهقت من البوس!!!! خليكم فاكرين المشهد ده مع ماجدة الخطيب حنرجعله بعدين.
بمناسبة يوم الحب، أحب أهدى المقال ده لجميع القارئات المستوحى من باكورة قصص وتجارب سكن طالبات الجامعة الأمريكية فى اليوم ده على مدار 6 سنين متواصلة:
1- أول حاجة لازم ضبط النفس.. يعنى مش عايزين خناقات مهما اللى قدامك حاول يستفزك: اعرفى إنه ممكن بيكون بيحاول يتهرب من إنو يحتفل باليوم ده. خليكى أذكى منه. اليوم ده أهم يوم فى السنة.
2- مش مهم هيوديكى فين، المهم هيعاملك إزاي. ركزى معاه وانت قاعدة معاه هل بيبصلك فى عينيكى ولا بيبص فى كل حتة إلا عينيكى. والله لو وداكى فين وجابلك إيه، ومحسسكيش إن العالم بيدور حواليكى من خلال أفعال على أرض الواقع، اعرفى إنو مش صادق وإنك حاجة بيتسلى بيها.
الورد أكبر مؤشر خطر
3- مؤشر كبير جدا على نيته من ناحيتك هو الهدية اللى هيجيبها.. الورد أكبر مؤشر خطر.. لأ كفاية بقى تضحكوا على نفسكوا.. لما حد يجيبلك ورد يعنى ده إنسان ما أخدش من وقته 3 ثوانى عشان يعرف انت كشخص بتحبى إيه.. لم يلاحظ جوانب شخصيتك، الأشياء البسيطة اللى تسعدك، فاستسهل وجاب لك أكثر شىء تقليدى فى التاريخ.. بعدين خللى بالك من حاجة الورد أكثر مدة يعيش فيها إيه 4 أيام؟ أسبوع؟ ساعات الواحد بيتصرف من اللاوعى.. هو المفروض تفهمى إيه لما حد يجيبلك حاجة آخرها أسبوع؟
4- الراجل بيحب البنت اللى تمثل عليه.. مهما أقنعك بخطبه عن الصدق والأمانة والتفتح والاطلاع.. اعرفى انو دى حركات علشان يجرجرك فى الكلام.. بس لازم تصرفاتك تثبتله إنو "نابه طلع على شونه". فمثلا: لو بتشربى سجاير امسكى نفسك ساعتين قبل ما تخرجى معاه عشان ريحة السجاير تروح من عليكى.. ولو انت قاعدة معاه هو دخن، كحى جامد وقال يعنى إنت حتى ما تعرفيش ده اسمه إيه.
5- اعرفى إن الشخص اللى قدامك بيفكر فيكى جد وبيحترمك فعلا لما يطلب إنو يشوفك بدرى.. فالمفضل دائما إنو يوم الفالنتاين معادكم يكون غدا أو بعد المغرب، آخر معاد تكونى فيه فى بيتك لازم آخره الساعة 9 ومهما كنت مستقتلة وهتموتى تسرقى معاه من الزمن وقت أطول "لأنه فى الأول والآخر كل شىء نصيب من ربنا" برضه وتحت أى ظروف لازم يعرف ويتأكد إن مع كل حبك وحنانك انت برضه عسكرى مع نفسك.. فى النص برضه ما يضرش تحبشى الموضوع وتبدأى تتنشنجى من أول الساعة 8:05 عشان تبقى فى البيت 9 عشان تسبكى الدور.
6- لو سألك إنت كان ليكى علاقات قبل كدة؟ اعتبرى السؤال ده طعنة فى كرامتك (وحتة فاتن حمامة كدة) وفهميه إنو كتير بيجولك فى الصالون، بس انت ما حدش منهم كان يستاهلك.
7- دايما حسسيه فى كلامك معاه إن حياتك مليانة من غيره. وقتك مشغول فى أولوياتك إنتى. ومن غير ما تقوليله وبأسلوب شيك خليه يحس إنو لو مشى من حياتك الساعة 4، الساعة 4:05 فى كثير أحلى منه وأغنى منه يتمنوا الرضا. هعيد تانى بأسلوب شيك ومؤدب مش ببجاحة. بس فى نفس الوقت اعرفى هو بيحب إيه؟ وإيه اللى بيسعده؟ واعمليه بس على أوقات متفرقة وبنسبة معقولة.
حذارى تتكلمى من قلبك، اعرفى إنو الرادار بتاعه هيلقط ضعفك.
8- وحذارى من إنك تفتحيلوا قلبك. كل ما تيجى تتكلمى من قلبك، اعرفى إنو الرادار بتاعه هيلقط ضعفك ورخصك تتسحب. أيوة.. معلش الحقيقة دايما قبيحة.
9- كنت الأول بينى وبين نفسى لا أحترم أبدا البنت اللى تقيم الشاب أو الرجل من خلال سيارته ورصيده فى البنك وثمن الفيلا اللى فى الساحل (كنت مسمياهم البنات البلاستيك). بس اتضحلى من خلال حكايات كثير إنو الصنف المادى من البنات هما دول اللى بيلاقوا الحب والاحترام والتقدير (أفكركم تانى نقطة اللاوعى عند الرجل مهمة جدا) وللأسف كل بنت حبت واحد لشخصه مش لإمكانياته كان يختفى من غير سابق إنذار وفجأة نلاقى صور فرحه فى المجلة أو لأسباب غير منطقية أو غير مفهومة يتفنن فى تفتيت قلبها وكرامتها وينكر فى كفر عتيد أى حاجة حلوة هى قدمتهاله. اتعلمى تبقى بلاستيك. للأسف يا كوكب الشرق "قلت الحب نعمة، مش خطية" بقولك دلوقتى " الحب صفقة، مش متأكدة من موضوع الخطية."
10- طبعا عبارة نبيلة عبيد المشهورة " فى الحلال يا معلم" مفيش داعى نأكّد عليها، اللى بيحبك ويحترمك بجد هيحافظ عليكى مش يستغلك.
مع إنى اتخرجت من الجامعة وسبت سكن الطالبات من زمان، ولكن يوم 14 فبراير كان دايما فى سكن الطالبات ليه مهابة كدة غريبة صعب توصف. النقاط المذكورة أعلاه كلها خلاصة تجارب بنات من جميع دول العالم كانوا فى اليوم ده، بعد يخرجوا مع الشباب اللى بيحبوهم، ويروحوا أحسن مطاعم، ويفرحوا بالهدايا، كانو كلهم على مدار 6 سنين يتجمعوا فى غرفتي، ما عرفش بصراحة إيه اللى كان بيخلّيهم متأكدين إنى قاعدة فى الأوضة يعنى ومش فى موعد غرامى زيى زيهم!! المهم ، وكانت كل واحدة تحكى قدام البنات خرجت فين وانبسطت إزاى، قد إيه اليوم ده أحلى يوم فى حياتها، بس فى نفس الوقت إيه العبرة اللى استفادت منها عشان يبقى من حقها موعد غرامى فى الفالنتاين. وبعد ما كلهم يخلصوا حكاياتهم، فى نفس واحد يلتفتوا ويسألونى فى استغراب " إيه ده يا غادة؟! أمال إنت عملت إيه؟" أبهت من السؤال.. أتنح شوية... مش عارفة ليه أفتكر عادل إمام وأقول نفس الجملة اللى قالها لماجدة الخطيب، وبضحكة كدابة أرد بصوت عالى " بوس.. بوس.. بوس...أنا خلاص زهقت من البوس!!!" يضحكوا كلهم. وآخر واحدة تقفل عليا باب الأوضة. أشد اللحاف وقبل ما انام أقول لنفسي:" إنشاء الله، السنة الجاية." كل سنة وانتم طيبين. ولو مش طيبين يبقى انشاء الله السنة الجاية"
ليست هناك تعليقات:
إرسال تعليق